醒起有台灣過江龍嘅馬辣，記得之前去台灣都有食過，深深俾佢任食嘅Haagen-Dazs吸引住～當然，係香港呢個乜都貴嘅地方，又點會咁容易俾你任食Haagen-Dazs。
雖然冇得任食Haagen-Dazs ，但佢嘅價錢都唔算好貴，而且種類仲算好多，仲有得任食Dreyer's
可能因為咁，排隊嘅人都好多，等位同食完走嘅人都塞滿晒成個𨋢口～
我哋攞咗飛先發覺，原來有App可以攞飛，真係激死～下次會醒啲
因為可以叫兩種湯底，我哋就叫左一邊麻辣湯，一邊皮蛋厭世湯。麻辣湯底就真係認真唔錯，我哋揀咗小小小辣，味道香濃又唔太鹹，而且加湯底嗰陣時，仲係加返麻辣湯底，絕對唔怕溝淡個湯呀～
反而對比下，皮蛋厭世湯就顯得有少少失色喇
至於食材方面，我就首推牛肉、生蝦同埋脆肉鯇，牛肉有晒唔同款俾你揀，雖然唔係好識分，但食落都有牛味，唔似平時大排檔嗰啲膏肉分明。生蝦同脆肉鯇就相當新鮮，生蝦一啲都唔霉，仲好有彈性～脆肉鯇食落舊舊都殺殺聲，好爽呀～
其他火鍋配料就一般般，勝在多選擇。
最失望無哂韭菜餃，得返洋蔥牛肉餃。雖然味道都唔錯，但就真係唔及韭菜餃咁令人齒頰留香、一試難忘～
最後，當然唔少得食雪糕同甜品啦～
除左Dreyer's之外，其實仲有其他雪糕、雪條，梗有一款啱你食嘅
P.S 雖然食物質素同價錢都合理，不過個環境認真要執執，個地下油到差啲俾佢跣一穫，啲冷氣滴水滴到周圍都係
