Lucky Smash (已結業)

平時成日喺港島嘅burger Joys食burger, 但係我平時蒲開荃灣，下下過去都幾唔方便，最近知道burger Joys喺荃灣開咗一條副線叫做Lucky smash, 簡直就係我嘅福音！即刻去試！唔好睇佢間舖頭紅噹噹，又只係得三款burger咁少選擇，就驚咗佢，呢度嘅漢堡係貴精不貴多。漢堡全部都係用澳洲嘅安格斯手打牛整成，而且薯條更加係喺你面前即刻切開個薯仔，即刻鮮炸，絕無欺場！再加上你可以完全見到員工喺入面係點樣製作你嘅漢堡包，係信心保證。由於唔係太肚餓嘅關係，叫咗一個Cheese Burger就算。果然係即叫即整嘅澳洲手打安格斯漢堡，牛味好重，肉質鮮嫩多汁！正！芝士雖然唔係雙層，但係都好足料，非常惹味！個包都絕對有心思，查咗牛油之後微煎過，令到件事更加香口。下次一定會再嚟食！