囍碟 (已結業)

今日，難得喺灣仔早收工，決定搵個朋友出離飲杯嘢，吹吓水，一齊happy吓，朋友話不如去利東街，果間囍碟，我咁順得人，一定無問題啦。去到6點幾，樓下已經無晒位，唯有上樓上， 叫左杯 Ginger Palace，入口少少酸，有好濃嘅薑味，仲有淡淡地嘅香茅味，飲落好醒神，唔錯，幾好飲。飲嘢梗係要叫d小食送吓酒，叫咗個喇沙蝦牛油果沙律炸雲吞，嘩！店員送到離，個樣好靚，即該攞件咬一啖，個皮好鬆好脆，又無油，d蝦又大又爽口，中間仲有沙律醬，撈埋切到細細粒嘅牛油果，蕃茄同青椒，味道好夾，好好味，另一精華所在，就係墊喺底嘅伴菜，用嘅係甜蕃薯切到一絲絲，再將佢炸到又香又脆又乾身，用離送酒啱晒，口感冇薯條咁 heavy，講真成碟嘢都好好味，我哋將佢食清光。跟住仲叫咗個巴東牛肉芝士批，一碟有兩件，我同朋友一人一件，單睇佢個樣，好似無咩特別，原來食過你就知，個批d皮係酥皮，中間d牛肉都好多，最好嘅係一片片㗎，唔係碎牛，所以食落好有口感，仲好軟嫩㗎，而d芝士焗到溶溶地，又唔溜，送酒又係一流。同朋友吹吹吓水，原來唔覺唔覺都差唔多8點， 所以我地都埋單走人，順便行吓，變到咁有特色嘅利東街。