Fûhn Express (已結業)

前幾日喺新世紀廣場行街行到夜晚，有啲肚餓，又想慳錢所以打算平平地食個晚餐就算。之後就上咗food Court搵吓有啲乜嘢食，其實本身都唔會有太大期望食到啲咩好好嘅嘢，點知喺food court搵到差唔多到盡頭嗰陣，發現咗呢間新開嘅越南餐廳，好快就俾佢嘅餐牌吸引咗。《雞絲湯粉》$50味道唔錯，個湯幾鮮甜，配菜適中，雞絲份量多，而且口感都唔錯，粉嘅份量都好充足，好爽滑，整體來講呢個價錢都幾抵食。《越式春卷》$32初頭嗌嗰陣都好猶豫，因為有啲擔心味道會好普通，點知一咬落去嗰下，佢俾我嘅感覺並非個種主要得菜嘅春卷，起碼係有一半以上都係肉，剩低嘅有紅蘿蔔同粟米等等，而春卷皮非常之香脆，好有口感，啲肉都好鮮嫩。《越式炸牛油雞翼》$48我諗呢一道菜可能係我呢餐最滿意嘅一道菜，一咬落去，炸蒜嘅味道即刻湧上嚟，好多肉汁，完全唔會因為雞翼炸乾咗而冇哂汁，相比起出邊嘅雞翼，呢一款真係一流，值得推薦。 整體來講，我對呢一餐好滿意，下一次經過依然會再幫襯。