點茶館

營業中

休息中

收工同朋友行完APM，諗住入Food Court隨便食解決一餐晚飯，但估唔到都有驚喜，就係一間專門食蒸飯點心嘅舖頭。同一般點心專門店一樣有好多款點心選擇，除此之外，仲有抵食套餐，包括各款荷葉蒸飯、點心同埋茗茶，價錢都只係$68 ，非常實惠！仲有三款期間限定嘅點心，當中竟然有葡撻，可惜當日太晏去已經賣晒，下次一定要試吓！花多眼亂嘅哦就揀咗點心拼盤，非常適合試哂最王牌嘅點心，包括蝦餃、燒賣、炸雲吞、叉燒包，同埋棗皇糕。全部點心都係即叫即蒸同埋即叫即炸，所以都要等大概10分鐘，而蒸飯大概要等15分鐘，所以拎嘅時候全部點心都係熱辣辣，好有去酒樓食點心嘅感覺。除咗點心拼盤，我哋仲額外叫咗鮮蝦腐皮卷、流沙奶皇包，而最令我深刻嘅係一款叫五目素餃嘅點心，喺出邊冇見過之餘，味道仲好出眾，雖然係素餃，但係味道一啲都唔俾肉餃輸蝕。所有點心價錢都好實惠，有酒樓點心嘅質素，仲唔使加一 ，好抵食！