最近轉咗工，由以前成日坐office到而家要周圍四出見客，每日都有機會走遍港九新界。雖然四圍去會好攰，但最大得著係可以走訪唔同區發掘好餐廳。今日就咁啱過海見完客，又知道銅鑼灣有間新開泰國菜，所以即刻急call港島飯腳出嚟撐枱腳。
餐廳位於銅鑼灣廣場2期，地點嚟講唔算難搵，路痴朋友冇盪失路都搵到。餐廳門口簡約，主色用上淺綠配上金色作副調，整體感覺高雅亮麗。
最後因為太肚餓，又唔想花太多時間去諗食乜，所以就點咗一份晚市二人套餐加一份生蝦刺身。而份量亦非常有驚喜。
生蝦刺身
生蝦處理得乾淨，所有腸都挑哂出嚟，冰底上碟令到啲生蝦仲保持住好fresh嘅感覺，而且口感新鮮爽口。泰式生蝦汁味道偏香多過辣，口味較迎合大眾。
椰汁雞湯
雖然二人份量但都堅持用鍋爐上碟非常有誠意。湯嘅溫度十足，入口椰香偏清淡，中調有雞肉香味，整體有香濃嘅香茅作伴非常開胃。
脆炸蝦餅
每次食泰菜一定會叫嘅item，一上碟炸蝦餅品已經好撲鼻。炸嘅時間拿捏得岩岩好，唔會太多油或者overcooked。金黃色嘅脆炸皮包住爽口彈牙嘅蝦餅肉，每人得兩舊有啲唔夠喉。
原隻鹵水豬手
侍應上菜一刻我同飯腳都不約而同呆望住，因為呢隻原隻豬手實在大碟得太誇張，鹵水香噴噴而且入味，每嚿豬手都係啖啖肉，大嚿夾抵食！
泰式炒雜菜
感覺上同其他菜式比較格格不入，而賣相平平無奇。但食落鑊氣夠勁而且炸蒜味濃，好快就成碟清哂
泰式鮮蝦炒金邊粉
又一道食泰國菜必點嘅Item。即叫即炒，鑊氣夠勁，蝦大大隻，每一條金邊粉都香氣洋溢。另外侍應亦會附上乾辣椒粉、魚露同辣椒油，細心程度十分抵讚。
