呢間舖轉過舖位
見佢個空間大左咁多 好評都唔少
第一次嚟對佢都係有少少期待嘅
雖然都仲係一個lunch嘅時間
但係同朋友其實係特登為咗嚟食甜品
諗住始終係一間Cafe 都應該係有甜品食嘅
但可能係因為疫情又或者係其他原因
所有蛋糕同埋其他小食都要三點之後先供應
三點前就只有以下Menu供應
我哋一開始冇睇清楚 就直接入去餐廳食啦
咁冇理由入咗去嘟完安心坐低又走㗎嘛
好啦咁我哋就食午餐啦
之後先再去第二度食甜品
千島滑蛋漢堡包 $62 + 洋蔥圈 $10 👍🏾👍🏾👍🏾
千島醬同埋滑蛋比睇上去更加多
但舊肉相對上就細細舊
而塊菜就明顯特登放出放底嘅包
咁個賣相當然係靚啲啦
可能啲醬都比較多
所以食落口就一啲都唔dry
芝麻包個面都算脆
咬落去或者切落去都聽到明顯嘅聲音
我必須講個洋蔥圈
我以為會係一兜仔另外上
不過係直接放喺薯條上面
$10 3個洋蔥圈
話抵又唔算但貴又未到咁樣囉
薯條啲色水都靚
不過食落就有啲鹹同乾
醬烤煙鴨胸豬漢堡 $65
啲料都算多 所以個包都幾高下
由上而下就係兩舊點咗醬嘅煙鴨胸
一塊豬漢堡扒 好多生嘅紫洋蔥 大大塊生菜
雖然鴨胸係有醬嘅
但嚿豬就偏乾 洋蔥都幾辣
芝麻包又唔係行鬆軟路線
結果就顯得成個包都好dry
就咁食真係搞唔掂
要點啲茄汁先再咬到個包
最後附上單據
佢嘅項目係啱嘅 對得上我食嘅嘢
但係舖頭名同地址唔知點解係第二間舖
之前聽人講係平價好食burger
Burger黎講其實佢唔係特別平
最多只係話對返質素算係一個合理嘅價錢
但如果係為咗食burger嘅話
我就應該唔會再嚟呢度啦
