竹串日本料理 (已結業)

有日同朋友仔出去銅鑼灣行街，醒起好耐冇去過登龍街搵嘢食，所以就去行個圈睇吓有咩新餐廳。見到呢間餐廳樓下有個姐姐派傳單，見到傳單上面嘅相好吸引，決定上去食下先！我就叫咗個海鮮丼定食。有少少前菜同沙律。跟住就到主角海鮮飯上場，刺身都相當豐富，有牡丹蝦，八爪魚，吞拿魚，帶子同海膽。各款刺身都相當唔錯，最有驚喜嘅就係牡丹蝦同海膽，十分鮮甜，都相當有份量。而朋友就叫咗個燒銀鱈魚定食。除咗主角銀鱈魚之外，仲有幾串串燒，有秋葵，豚肉，翠玉瓜，雞翼，小甜薯。唯一美中不足嘅就係銀鱈魚份量相對比較少，唔係好夠喉。喺銅鑼灣血拼過後食到一餐味道唔錯嘅日本餐都相當滿足啊。