先講個位置，搭笠到11樓一出笠轉左就見到呢間餐廳，應該好易搵到。
野食同價錢方面我覺得都算足料大份同抵食，強烈推介加多$30升級埋個豪華定食，水果好多，同平時出面買既份量差唔多，仲要有湯同兩個小食。
野飲方面我哋嗌左星晨大海同玫瑰鮮奶咖啡。
星晨大海真係好靚，好岩打卡，而且味道唔算好甜，好清新。🌈🥰
玫瑰鮮奶咖啡就有淡淡既玫瑰花香，好少會飲到，幾特別。🌹☕️
野食方面我哋嗌左一份椒鹽炒甜粟米手指，Chill All Day Breakfast ，泰式青咖喱烤雞扒牛油果再加$30 升級埋個豪華定食。
椒鹽炒甜粟米條，之前係出面都有食過，但好多時都比較乾身，但呢度既係咬入去都仲會爆汁，幾驚喜，唔錯，而且都有鑊氣，好味😋
Chill All Day Breakfast 整體都唔錯，份量好足，我個人比較欣賞個包，外脆內軟。
最後到泰式青咖喱烤雞扒牛油果加豪華定食，呢個餐真係令我好滿足👏👏🥳首先青咖喱唔會好辣但又好香好滑👍👍，雞扒烤到岩岩好，又厚又多汁，本身我都唔知點解會有牛油果，不過食完青咖喱之後再食牛油果又幾解膩，呢個配搭幾好，抵讚。
而加左$30既豪華定食分別有蘑茹湯，炸豆腐，蛋沙津同水果杯，味道都唔錯，性價比高，值得追加。
整體來講，環境，味道，價錢，出餐速度同服務我都覺得好滿意，值得推介。
