鉄皇子小賣所，食佢嘅鐵板料理係重要，但更加重要嘅係，可以現場面對面令距離欣賞前xxxx酒店主廚Ken哥嘅鐵板燒表演。
小賣所設於太安樓，所以佢嘅鐵板料理價格非常親民，一個非常飽肚嘅鐵板牛丼都係60蚊冇找
但價格親民嘅同時可以為你提供非一般嘅食材品質。
今次我哋叫咗四款鐵板美食
首先推介嘅係鐵板一口和牛粒，和牛粒肥瘦適中，唔會話一啖咬落去成粒都係肥膏
和牛粒用酒燒方式處理過，粒粒都煎到外皮脆脆地，但係咬入去又充滿牛汁嘅軟腍，而且以依個價錢嚟講份量仲一啲都唔少。
之後係牛肉薄燒，牛肉片經過鐵板燒香咗將裏面嘅油脂香迫晒出嚟
再加上牛肉片包住大量嘅蔥同埋蒜，一啖咬落去，牛油香蒜香蔥香混合晒一齊，嗰種味道直谷上腦，正！
鐵板羊架又係一樣用酒燒方式處理過嘅美食，羊架本身睇得出肥瘦均勻，而且唔會太騷
再加上酒燒處理過，基本上色香味俱全，而且咬落去一啲都唔嚡口。
然後就係性價比最高嘅鐵板牛肉丼，你冇睇錯一個用鐵板處理嘅牛肉丼飯竟然只係賣$58
我加多個炒滑蛋都係加多$15，過份量已經多到一個成年人都差啲食唔晒。牛肉片嘅雪花分明。
絕對唔係拎啲平價貨嚟整，燒香咗嘅牛肉再加埋蛋香十足嘅炒滑蛋，再加上Ken哥秘製醬料，成個丼飯嘅感覺根本就係高級日本餐廳嘅製成品，再加上仲可以現場睇到Ken哥嘅鐵板表演，諗唔到咩原因唔去試。
