雲桂川冰室 (已結業)

今日母親節由於我媽去左屯門嘅關係，所以就去左屯門搵佢食母親節飯，而龍門居多野食就係人都知，但冇理由母親節都掃街食，於是乎就搵左茶餐廳食小菜慶祝。呢間小店座位唔多，大約都只係坐到１２個人，但係外賣單就接唔停，我地都等左一個鐘左右食物先至到，而食物我地都冇失望，係值得等嘅。西蘭花炒帶子炒得好有鑊氣，絕對同酒樓有得比。帶子數量都幾多，而且都算大粒，食落都唔會食到雪藏味。豉油皇大蝦煎香左嘅外皮有少少脆，蝦殼豉油味好濃，而蝦本身都幾大隻。XO醬西芹炒蝦球，落左ＸＯ醬去炒特別惹味，不過美中不足嘅係蝦係蝦仁而唔係蝦球。水煮牛肉可以自選辣度，牛肉份量都幾多， 又夠滑。豉椒鮮魷魷魚份量好多，而鮮魷炒得都好入味。