Lucky Smash (已結業)

今日晚餐出去買外賣經過享和街時，見到一間新開嘅餐廳出面有好幾個人等緊外賣，咁就行過去望下，係中途就聞到好香嘅燒烤牛肉味。原本諗住去茶餐廳買啲炒粉麵，但聞到咁香都忍唔住試吓。叫咗個套餐包雙層牛肉芝士漢堡，炸薯條同一罐汽水。另外加多個芝士漢堡，見到加$10就多一份熱狗，咁就叫埋。喺等嘅途中，見到職員喺度用啲免治牛肉整緊漢堡扒，睇落都好大舊同新鮮，加上用鐵板烤煎出嚟嘅牛肉香味，搞到我好鬼肚餓。返到屋企，立即拆開雙層牛肉芝士漢堡，嗰兩塊漢堡扒加埋有成一吋半厚，加埋溶咗嘅芝士，千島醬汁和生菜絲，食落真係好Juicy 同帶出塊漢堡扒香濃嘅牛肉味。而薯條拎到返屋企都仲好香脆，好好食，食完已經好夠飽。份熱狗就留返第二日當早餐食，真係超值。