上海弄堂菜肉餛飩 (已結業)

平時約朋友食飯，習慣唔係食日本野就係西餐，今日友人就懶特別，話帶我食上海弄堂，食上海野所謂「弄堂」即係上海小巷嘅意思，係食上海家庭菜嘅地方！行入餐廳，已聽到陣陣上海音樂，連同牆上嘅掛畫，非常有氣氛呢！見到餐牌有一個$78嘅一人套餐（全日供應），既然咁扺，無理由唔嗌嘅！我地仲好健康嗌左個上海腿茸津白$70！套餐小食方面，我同友人分別嗌左四粒餛飩同春卷！前者皮薄，餡料豐富，連湯一齊食，熱辣辣好味道！後者外面炸到脆卜卜，外脆內軟！主食方面，我地叫左個陳年花雕醉雞同黃金排骨，同樣配菜飯！食後我個人比較喜歡一醉雞，除左因為無咁熱氣之外，就係雞件酒味香濃，肉質嫩滑，有驚喜！一餐飯點都唔能夠唔食菜既，呢個津白出色既地方係個上湯，連一向唔多食菜既友人，一陣就掃清！今餐上海野大滿足！