盛八日式燒肉放題店 (已結業)

之前已經嚟過幾次盛八，5:30入座，人唔多又夠平。今日父親節，老豆最鍾意食燒肉，所以唔駛點諗就揀左盛八，今次仲豪一次試吓set B，優惠時段$298/位，任食兩粒鐘，可以多15樣食物選擇，仲送日本受賞和牛。【日本受賞和牛】- 睇啲紋就知道塊牛有幾咁有油脂，一燒就香味四溢，每人送一大塊，size成隻成年男人手掌咁大，絕不欺場~【鹽燒松葉蟹身(下圖下)】- 其實燒蟹肉係幾好味，不過幾難食，係難食到啲蟹肉，如果係蟹腳就好啦~【厚燒牛舌(下圖右下)】- 之前食親都係薄，呢度呢啲好厚好爽，老豆最愛。【特級燒汁美國西冷】 - 夠juicy又大塊，當然冇日本受賞和牛咁好食但都唔差，牛味十足。【18cm鎖鏈黑豚豬】- 好特別，真係好長，肉質軟腍肉味豐富，不錯。【香蔥雜菜和牛湯】- 不過不失，我鍾意蜆湯多啲，鮮甜啲。【七輪燒活蛤】- 活蛤本身夠鮮甜，燒出嚟香口。【意大利香草牛油帶子】- 落咗單兩次催咗兩次先嚟……都幾大粒，加片檸檬酸酸地，幾特別。【大蝦山芥和風沙律】- 叫「大蝦」但隻蝦一啲都唔大，不過食咁多肉點都要食啲菜中和返。【芝士櫻花黑豚肉卷(右)】- 每次嚟都必點，係咸咗少少，不過真係好香口惹味。