影片
更多
2011-07-16
89 瀏覽
平時同朋友係上環一帶,若果想慢慢食慢慢傾,間中都會幫襯富臨上環店!因為係我地印象中呢間酒樓嘅食物,環境,服務,衛生各方面質素都算唔錯,價錢唔算太貴,係間中至失手,相比嚟講我地對佢較為有信心!中國人就最有家庭觀念架勒,繼上次為住係加拿大嘅親戚難得返港而去明星西營盤店飲茶慶祝之後,前排就有啲比較疏嘅親戚返港,大家就例牌抓緊機會坐埋一檯食餐飯傾吓計,珍惜相處嘅時光!不過老實講呢班所謂親戚打算盤都打唔埋,我同佢地就唔係好熟喇!經過長輩安排之下,再就埋時間,就決定成家人去富臨觀塘店食飯!橫掂去開觀塘,就緊係順便行吓apm啦!行完之後就過去,同酒樓都幾近吓!我地去到果陣都相當熱鬧,好多人打邊爐,不過訂咗房就唔駛等啦!呢度我地都幫襯過好多次,今次總算冇令我地失望,各方面質素都算唔錯,價錢唔算太貴!味道方面,今次14個人叫咗龍躉燕窩宴,結合屋企人同埋自己嘅評價,味道皆算唔錯!食物包括1)堂剪童子豬全體:隻豬嘅外皮都夠脆,不過真係好肥!肥膏多過肉,似乎選材不當!(2)碧綠琥珀蝦球:蝦球幾彈牙,略嫌蝦味同鮮味不足!其他配料都幾有鑊氣!(3)香酥荔茸玉帶:將帶子沾上芋茸再攞去炸,做法獨特!帶子能保留原有鮮味
味道方面,今次14個人叫咗龍躉燕窩宴,結合屋企人同埋自己嘅評價,味道皆算唔錯!食物包括:
(1)堂剪童子豬全體:隻豬嘅外皮都夠脆,不過真係好肥!肥膏多過肉,似乎選材不當!
(2)碧綠琥珀蝦球:蝦球幾彈牙,略嫌蝦味同鮮味不足!其他配料都幾有鑊氣!
(3)香酥荔茸玉帶:將帶子沾上芋茸再攞去炸,做法獨特!帶子能保留原有鮮味,配合脆脆嘅芋茸,認真美味!
(4)鮮蟹粉扒豆苗:豆苗唔生唔老,選材恰當!蟹粉就唔知係咪真材實料喇,但係味道幾濃,送豆苗一流!
(5)竹笙蟹肉燴燕窩:燕窩就例牌唔覺有,係咪融咗落湯度我就唔知喇!反而竹笙同蟹肉就幾多!湯底較傑,似乎打咗唔少漿粉!
(6)清蒸沙巴龍躉:條魚蒸嘅時間控制得唔錯,魚肉離骨得嚟又幾滑!
(7)蠔皇原隻鮮鮑玉掌(12隻):鲍魚同鵝掌都夠腍,又幾入味!醬汁同樣幾傑,打咗唔少漿粉!
(8)脆皮炸子雞:皮又香又脆,雞肉又滑,簡直係皮脆肉嫩!不過好多雞油,亦好多食油!
(9)自家製臘味糯米飯:臘味分量頗多,味道突出!糯米鹹度適中,質感正常!
(10)野山菌燒伊麵:菇菌分量頗多,有唔同種類!伊麵鹹度適中,質感較腍!
(11)精美甜品:紅豆沙味道幾甜,紅豆粒分量唔怕太小!不過湯底好傑,打咗好多漿粉!
(12)合時鮮果盆:西瓜,菠蘿等生果水份充足!可惜唔係幾甜,亦係市面上生果嘅趨勢!
環境方面,富臨觀塘店開業應該有好多年時間,地方都好殘舊!佢嘅裝修唔係而家部分酒樓好豪華高貴嘅風格,亦唔係較為新潮搞鬼嘅裝修,而係舊式嘅平實格局,呢個年代嚟講就顯得比較老套!佢冇設置顧客輪座電腦管理系統(列印輪候票,螢幕顯示輪座狀況及自動發聲叫號),自動感應水龍頭,自動感應梘液機等先進設備,先進與否就見仁見智!另外佢電視機唔算多唔算大,模擬電視訊號又唔穩定,畫質亦差強人意!呢個舖位雖然係幾大,不過位處於比較舊嘅樓宇中,有柱多,橫樑多及樓底矮等等嘅問題,視野唔算廣闊!另外檯凳部分放得較擠迫,部分就放得寬敞!整體總算坐得自在,始終唔應該要求咁高!
服務方面,大部分服務員工作效率同態度都中規中矩啦!不過唔識主動加酒水!若果各個服務員有多啲笑容就更好!
衛生方面,碗碟污糟邋遢,地方尚算企理,洗手間又係好污糟!
抵食方面,星期日晚幫襯$3888包12款菜式,智利德利文加紅酒1支,大燕京2支,汽水6罐,卡拉OK,茶芥及加一服務費,價錢可以接受!
整體嚟講,呢個龍躉燕窩宴價錢唔算太貴!至於食物,環境,服務,衛生各方面質素都算唔錯,係我地嘅要求嚟講係合格嘅!當然各方面質素未係盡善盡美,仍然有改善嘅空間!食飽之後,我地再係附近行多陣就搭車番屋企喇!
張貼
