由於一蚊雞羊腩煲只限宵夜優惠，由晚上八點半先開始，一早到達杏花邨，先到稻香問定入座安排與細節，以免專登過嚟食唔到羊腩煲，原來八點鐘開始可以取飛，取飛後就可以暫時離開，至八點半再回到酒樓門口才會安排入坐。
我哋好聽話跟足指示去做，八點半就順利入坐，一坐低就用手機掃描稻香二維碼用手機點菜，就係想快人一步，以免無得食羊腩煲。喔？原來羊腩煲係唔可以單點，必須要跟餐，餐有三個選擇:1）安格斯肥牛$136 ；2）鮮活鮑魚$88；3）噴水象拔蚌$168⋯⋯有一些取巧☹️我選了最平的鮑魚，由於實在太肚餓，我哋驚唔夠食，所以再叫多一個濃湯花膠雞煲$168。
羊腩煲就真係好不錯，羊腩都算幾多，拼羊腩煲的配菜都幾多幾豐富，味道亦都正常👍🏻。但係嗰四隻鮑魚就真係唔係好掂，完全冇鮑魚味外仲要實過石頭，口感就好似𡁻緊掃字膠一樣，相當古怪☹️
最唔掂都總算係嗰個濃湯花膠雞煲，個湯極之鹹，鹹到飲唔到，花膠味道與口感又古怪，一定係最平價最低級的花膠☹️隻雞亦都麻麻地，真係一粥麵個花膠雞煲好食過佢😫雖然我哋都唔算好飽，但真係望住個雞煲都唔想食，埋單時食剩都幾多。
根據這一餐經驗有一個人建議，就係只點$1羊腩煲，強迫加配揀肥牛，未加茶芥及加一收費合計$137，真係唔飽都唔好點其他，實在太過唔掂，寧可落樓下一粥麵食個七十零蚊嘅雲吞雞煲，慳返百幾蚊之餘仲有品質保證🤣
