富東閣海鮮酒家 (已結業)

喺而家晚市禁堂食令下, 唯有晏晝食飽啲, 所以就飲茶食包包食飽啦! 指定動作之後, 職員安排入座, 職員隨即喺煲緊嘅滾水入面拎啲熱辣辣嘅碗碟奉上,  唔會將啲碗碟放晒喺枱面, 咁樣比較衛生。我同 P san 兩個人, 點咗 6 個點心, 包括有我哋都鐘意食嘅馬拉糕同叉燒包, 另外, 仲有咸水角、菜苗餃、鳳爪同埋藥膳鳳爪 (因為太餓, 一上枱就食, 唔記得影相 😅) 馬拉糕好鬆軟, 而且又有少少奶香, 好味;  叉燒包偏甜咗少少, 不過有叉燒香味, 係唔錯嘅; 菜苗餃入面隻蝦爽脆, 而且有些少蝦嘅鮮味, 估佢唔到; 鳳爪方面就唔算太腍, 但都入味, 唔錯; 最後係個藥膳鳳爪, 喱個有少少驚喜, 有香濃嘅藥材味, 最突出係當歸味, 而鳳爪又腍又入味, 值得一讚 👍富東閣嘢食嘅味道唔錯, 而且啲枱隔得開, 唔會坐得迫同唔舒服, 可以 hea 下, 係食 tea 嘅一個唔錯嘅選擇。