禮 (已結業)

朋友介紹話呢間叫「禮」嘅居酒屋唔錯，女朋友話情人節不如去呢度試吓香港舖租貴，環境狹窄都預咗，我哋都唔太介意，但服務質素真係有待改善，年初五差啲幫人開年😂叫服務員加茶，次次都話轉頭嚟但冇嚟；上碗飯又冇擺低匙羹，舖頭細細，舉手舉咗成5分鐘舉到我50肩都冇人理。呢餐加一畀得好唔gur😂見到隔籬枱對情侶都食到黑晒面😂😂😂啲上菜次序錯晒，前菜都未上就上個玉子燒，同上多碗飯嚟嘆吓，最後先上串燒，等咗成個鐘先上齊啲嘢，然後5分鐘食完。坦白講啲嘢食真係好普通，蟹膏玉子燒冇特別平平無奇，冇蛋味冇高湯味；鵝肝和牛丼成$200一碗，醬汁偏甜，冇鵝肝味冇和牛味，份量又細，完全唔值，寧願食某連鎖店嘅牛丼；串燒唔熱仲好乾，食完完全冇記憶點，淨係記得牛舌勁韌咬都咬唔開，整體Overpriced性價比極低食到最後，個前菜「酒盗芝士」都仲未嚟，索性取消埋單走人，最後都仲要出錯單，漏咗一入座就擺低喺你面前嘅前菜，麻煩先生畀多$20吖唔該