聚華餐廳

營業中

休息中

搬咗黎新蒲崗都四年幾，試過好多茶記，都仲係未搵到一間覺得滿意嘅常餐，但就響今日俾我食到啦，仲要響樓下好近，點解我唔早啲試呢😭話說今日又係一個唔知食乜好嘅WFH中午，本身諗住唔用腦去mos算啦，去到聚華門口，見到係後生仔嗌人入去食啦，睇門口我一直以為呢間野啲樓面係啲好兇惡嘅大叔而唔敢行埋去，原來又唔係喎，見到常餐第一個choice有奶油豬，就決定入去試吓。叫咗個常餐係蕃茄牛肉米、奶油豬、熱奶茶。個蕃茄牛肉米唔講得少呀，個湯唔係hea用茄膏，飲得出係有用蕃茄、紅蘿蔔、西芹煲，仲有少少八角味，完全無味精，個面有幾舊大大舊紅蘿蔔，啲牛肉係放響碗底倒入熱湯浸熟，係爽口個喎（我覺得應該係有用鬆肉粉但應該唔多），米粉亦彈牙，總之成件事食味清新又夠味，我成碗清晒飲埋個湯呀，已經好耐無試過會飲晒啲湯。個奶油豬更加不得了呀，圓果面係脆皮，平面係軟，牛油係有心機咁搽到適量平均，練奶亦係淋到好均勻，咬落去入面係鬆軟而濕潤！而個奶茶係茶味奶味均衡無澀味！天呀！成個常餐天衣無縫，好好味呀~~~~~~~埋單係個有style嘅肥仔戴黑石耳環都幾型。雖然個環境唔係靚仔同有啲逼，不過我一定會encore架！