吉列牛忌廉烏冬專門店 (彌敦道) (已結業)

上網睇到咁多比like嘅食評，讚得咁緊要，就同朋友嚟試下咩料子。好好彩，本以為爆多人，點知六點幾到無乜人，又正剛好遇到日落，隔離落地玻璃，睇到出面好大個咸旦黃，好靚。喇喇聲點左我期待嘅招牌烏冬，同埋吉列牛定食。當烏冬來了，我用筷子一撈，就知伏味開始湧出嚟。汁又水又浠，烏冬煮過龍，一夾就斷，味道無特別。稱不上難食，都稱不上人人口中嘅驚豔。最伏都係朋友嘅吉列牛定食。唔洗食已經睇到，非常唔專業嘅吉列牛。本來舊牛已經比廚師炸熟左起碼有7成，純粹侍應放個爐仔，等我地扮晒野自己番熱舊牛咁簡單。至於醬料，同吉列牛本來味道唔夾。我相信茶記吉列豬扒會好食過佢呢間吉列牛。我明白一分錢一分貨。牛薄而溜氣，烏冬欠缺誠意。再次感嘆又比食評呃左。