同屋企人嚟到攞飛等位都係近十點，都等咗好一陣先至有位。 等緊嗰陣，有個人同門口嗰位問：見到入面有四張枱冇人，但係冇人執枱。臨入嗰陣，門口嗰位同我哋講坐卡位茶錢加三蚊得唔得？咁我哋話得。
坐低咗，阿妹發現櫈入少少嗰度，有啲可能係細路用原子筆畫花咗少少張凳，都幾明顯。 雖然明明酒樓畀嗰支筆喺鉛筆，唔係原子筆。 坐低咗之後，有個人呢鋪枱布同埋畀餐具，嗰時唔知佢係咪太趕時間la，將啲餐具好似比較好亂咁樣，就咁擺曬喺度就算，睇落好凌亂。 比午市點心紙嗰陣，有少少似劈落張枱(少少)。 所以由一開始，等位到執枱都有少少覺得呢間嘢掂唔掂㗎？！好似唔多妥嘅感覺，但係之後食物方面都唔錯嘅。
過咗十點已經喺午市。 比起馬鞍山嗰啲酒樓，我覺得呢度嘅點心都係有啲新鮮感嘅，馬鞍山都好少有紅油抄手。我哋四個人嗌咗九個點心。茶，我哋嗌咗鐵觀音 。
臘味粒咸薄
睇個名覺得會唔會臘味比較多，但係黎到先知唔係好多。同平時食開嗰啲咸薄差唔多，同埋呢個比較粉，麻麻。
香茜牛肉腸
不過不失，唔錯嘅
鮮蝦米網腸
幾好。個網都幾脆，口感唔錯。粉皮同埋鮮蝦都唔錯。呢個點心唔伏。之前喺馬鞍山一間酒樓都有呢個點心，但係之後佢無啦啦轉咗蘿蔔涵仲幾難食下，而家嚟呢度食返個正常版本嘅
蜂蜜芋角
唔係好食到蜂蜜味，但係作為一個炸芋角係唔錯嘅，好脆。作為一個炸物嚟講都幾令人滿足。
紅油抄手
順德經典都有呢個點心，但係佢嗰個係紅油就真係油嘅，呢個就係用一隻醬，唔係用油。食落甜甜哋唔會太辣，都幾惹味嘅。
香煎鳳凰糯米雞
呢個我覺得麻麻。點心紙入面幅相，影到都唔錯。但係點心到左之後，就覺得係一個圓形嘅糯米雞，然之後有一層薄薄嘅蛋包住咗佢咁樣囉。味道比較普通，冇乜特別。
芋絲炸春捲
嚟到都熱嘅，應該係都係即刻整嘅，同埋 都唔錯，因為我主要嗌呢個係想食炸嘢。
紫心香芋丸
放題好多都會有香芋丸食，呢個點心有香芋味之餘，脆撲撲，熱辣辣。
呢度清碟比較快，空碟擺咗喺枱邊就好快有侍應收碟。
最後呀爸埋單，竟然冇散紙找，搞到阿爸要等下一枱人埋單睇有冇散紙找俾佢，搞到埋單都搞咗一陣。
1
