廣州點心皇 (已結業)

我上次黎幫親呢間點心專門店應該差唔多係一年前，專門店o岩o岩開張辦團購，所以買左好幾張黎試，每次食完都好滿意，所以今年再辦團購，我都即刻買番幾張，當然價錢冇上年咁平唷~朋友未試過夜晚食點心做晚餐，所以今次算係朋友的突破同改變。朋友問我團購餐包括有乜野食? 我真係完全唔記得左，買完就算~我我地一坐低，侍應只問我地食燒賣定蝦餃? 排骨飯定滑雞飯? 揀完呢兩款，其他的都係標准左o既點心。由於朋友唔舒服，所以我要食晒碟炸春卷同炸雲吞，每人各1件。兩樣炸物雖然唔算係o岩o岩炸好，但好脆，好香口。我食晒2件春卷，朋友問春卷餡料係乜? 我都唔肯定係唔係蘿白茸? 但咬落去唔多似係食肥豬肉之類，結果我投降。我食晒D炸野，所以朋友就負責食晒成碟叉燒腸，叉燒算瘦，蒸得o岩o岩好，朋友話都OK好食。今次我冇點我至愛點心 - 蝦餃，而要左燒賣。燒賣面放D蝦籽略嫌少左D，賣相一般，唔多起眼，豬肉唔算肥，恰到好處。馬拉糕賣相幾靚，成個球形咁，比起平時酒樓果d不規則形狀，顏色亦有點兒淡左少少，好似都唔多習慣，冇傳統馬拉糕的感覺。馬拉糕蒸得好鬆軟，夠晒熱，甜度o岩o岩好。滑雞飯我完全冇食過，由於我已經食左半個馬拉糕。