地點：油麻地彌敦道
菜式：中式點心
餐牌：餃點類，酥點類，生滾粥，小食，中點類，包點類，腸粉類，飲品，蔬菜類，原盅燉湯，甜點類，籠仔蒸飯類。價錢親民。茶位每位$5。落單用QR Code。
蜜汁叉燒腸 $27
蜜汁叉燒腸一客兩大條切開六邊，半透明白色腸粉皮包住叉燒餡，服務員上枱時先加豉油。腸粉滑溜，入面叉燒餡都唔錯。
醬皇金錢肚 $28
醬皇金錢肚大概有5塊，口感係完美爽口彈彈地牙又滑滑地，個汁少少辣，好惹味，唔會太油或者重口味，面頭加上一片辣椒。下底居然有4粒冬瓜粒，可降低油膩感。
豉汁蒸鳳爪 $23
豉汁蒸鳳爪一客有4件鳳爪，整得好淋，味道都唔錯。下底加左幾粒花生，伴有一片紅椒同綠椒。
蝦餃 (2粒) $16
呢度可以選擇叫蝦餃燒賣4粒或者兩粒，價錢除返每粒係一樣，好貼心！蝦餃塊皮厚薄適中，入面餡料爽口，無辣椒醬食都唔錯。
燒賣 (2粒) $16
燒賣真係有大大粒蝦係面，面頭再加上蟹籽，下底係啖啖肉爽脆唔肥，仲有冬菇味，皮薄餡靚之表表者。
楊枝甘露 $22
楊枝甘露好足料，芒果味重糖水加有新鮮芒果肉，新鮮柚子肉同西米，味道唔過甜，滑溜清新。我地一人一碗。
榴槤雪媚娘 $35
榴槤雪媚娘一客兩大件，用錫紙放好。黃色薄身班戟皮包住新鮮榴槤肉同滑溜忌廉，榴槤味好香，食完成嘴都係榴槤味。
所有點心都係即叫即整，熱辣辣上枱，質素高，而價錢並唔貴，無加一。環境算乾淨企理，食左咁多點心人均都唔洗一舊水。
