東園金閣海鮮酒家 (已結業)

自從去過土瓜灣壹點甜之后，好少食到d有水準嘅點心，好多酒樓變成大集團，點心好鬼差....今日一早落灣仔，鄰近有哩間東園酒樓，於是乎上去幫襯吓。一上到去，環境光猛乾淨，又唔洗等位，大樂！鮮蝦餃，燒賣，春卷，珍珠雞，雞札，叉燒腸，到齊開餐！叉燒腸係驚喜，好多酒樓都偷工減料，變成碎叉腸，哩碟叉燒腸份量足，讚！蝦餃已經食到唔要求有竹筍，東園嘅蝦餃味道同份量都合格，皮薄，唔太咸，唯一要彈嘅係有d蝦餃皮穿咗窿。珍珠雞係另一驚喜，好多珍珠雞汁過多，一劈劈，東園無哩個問題，汁唔多，而且珍珠雞入面有蛋黃，啱胃口。有d燒賣入面只係一舊舊豬肉，好鬼硬身，東園食上去口感似蝦膠，口感同味道似土瓜灣一點甜一樣，正！春卷外皮脆，食得出內面有芋頭，算係足料之作。依家d酒樓人手不足，加熱水叫極無人理，東園服務好好，主動囉個茶壺加熱水，讚！