鹿角巷

營業中

休息中

星期五晚，終於的起心肝去鹿角巷買呢期好吸睛嘅黑糖鹿丸。雖然見到呢條人龍有少少卻步，但我都係乖乖地排左隊，我計過，由排隊到攞到杯嘢飲，共花左大約35分鐘。我一睇到限定呢兩個字就雙眼發光，二話不說買左杯黑糖鹿丸鮮奶（$28）。有兩種建議飲法，首先要霸氣直接飲，之後就可以搖勻9下再飲。一拎上手，杯飲品真係好靚，杯底暖暖地，因為啲黑糖珍珠，即係鹿丸，係熱架，一啖飲落去，果然係濃郁嘅黑糖牛奶味！之後我參考佢個建議飲法，搖勻再飲，感覺冇咁甜，但呢杯飲品，由於冰塊甜度係固定嘅關係，我建議要快啲飲完，因為啲冰會溝淡左牛奶味，而且如果佢加啲紅茶，等杯飲品有返啲茶味，應該會冇咁甜。不過都算係一試無妨。