芝加哥串燒酒場 (太和中心)

我自己就好鍾意去大埔搵嘢食，之前一路都有去開其他嘅酒吧，但係由於疫情關係，基本上而家可以坐得來，以舒服嘅酒吧，喺新界區，其實都真係冇乜；之前朋友帶過我嚟呢度，覺得都幾唔錯，特別鍾意佢嘅啤酒，麒麟啤酒，仲可以有各款唔同嘅味道選擇，所以我都有幾深嘅印象每一次嚟到，一坐低，我都會叫呢一杯桂花味嘅麒麟生啤，入口嘅時候佢會去除咗啤酒嘅苦味，反而係有好豐富嘅甜味同埋桂花香味，我自己就好鍾意，而我都覺得如果係平時唔飲開啤酒嘅朋友都可以試一試。食薯片我覺得係一定要試嘅，佢呢一度會整成一串，好方便食，而且佢加咗特色嘅辣粉，攞嚟送酒嘅話其實一流。呢一個鹿兒島A5和牛，其實真係好少酒吧同埋串燒店可以Offer到，首先，做呢一個，一定要有一個好出色嘅廚師，因為如果廚師整得唔好嘅話，其實會好容易浪費咗呢一個咁出色嘅食材；我自己食落去嘅時候，就都睇到呢度廚師嘅功架，本身食物嘅選材已經好好，而且猛火燒一段好短嘅時間，牛嘅油脂香迫晒出嚟，好豐富；食嘅時候再去點檸檬汁，可以令到食落去嘅時候冇咁油膩，而且更加可以打開食慾，非常唔錯。呢度嘅燒菠蘿都幾唔錯，炸雞扒配埋佢呢度嘅特色醬汁，非常好。