5
泰式炸蝦餅配甜梅子醬
炸蝦餅一共有3件，每件一開二， 炸蝦餅質地結實，再加埋甜梅子醬，食落好夾！
燒豬頸肉配辣羅望子醬
燒豬頸肉切成薄條，油脂香明顯， 豬嘅肉口感煙韌，配上酸辣醬汁正好中和油脂感
燒雞肉串配花生醬
燒雞肉串一共有4件，用竹籤穿起，雞肉切成小塊易入口，配上花生沙嗲醬味道香濃好惹味
鮮蝦芒果米紙卷
鮮蝦芒果米紙卷一共有6件，入面加入大量蔬菜、紅蘿蔔同埋芒果肉，最鍾意米紙卷入面加咗好多芒果肉，果肉清甜，加上米紙卷既醬汁好refresh！
紅咖哩大蝦配時蔬
泰式咖哩雞
同一時間想食蝦同埋雞肉，梗係一次過叫哂佢。一共有5隻大蝦，入面加入咗粟米筍、紅椒、蘆筍等時蔬。 另外一款就轉咗食材做雞肉，配菜都係一樣嘅材料，紅咖哩濃而不死辣，攞嚟送飯其實都幾夾
蟹肉忌廉咖哩配香脆長棍法包
另外都叫咗一款蟹肉忌廉咖哩， 忌廉咖哩口感creamy，入面加咗唔少蟹肉， 將蟹肉忌廉咖哩放上長棍法包上面， 長棍法包食落香脆又吸滿咖哩汁，真係無得彈
芒果糯米飯
最後叫咗一份芒果糯米飯，糯米飯有兩層，綠色嗰層係用咗班蘭葉汁，食落冇咩太大分別，加埋側邊嘅芒果粒香甜軟糯，作為甜品最適合不過
椰青
天時暑熱叫個椰青飲下，椰青口感冰涼清甜， 入面嘅椰肉仲可以刮出嚟食添
