祥榮餐廳

營業中

休息中

香港人都好鍾意喺茶餐廳解決一日三餐， 選擇夠多中式西式街坊小菜樣樣有。今日去开紅磡黃埔， 因為想食茶記小菜， 去咗好近地鐵站嘅《祥榮餐廳》。好耐冇食蒸魚， 揀咗一陣，決定叫<<蒸黃花魚套餐>>$85，豉汁蒸， 夠惹味。蒸得唔錯，魚肉熟透， 難得有咁大條嘅黃花魚， 送白飯超正！中湯：花生雞腳湯跟餐嘅例湯， 份量十足， 細过碟餸少少咋。 中湯 材料十足，雞腳花生， 滋潤得嚟唔覺有味精， 亦好有住家靓汤feel。西湯係囉宋湯， 唔算好濃郁， 以蘿蔔，蕃茄味為主。 再濃郁或辣一點会更經典。西芹帶子套餐$74好夠鑊氣， 可媲美酒樓小菜， 西芹夠爽脆， 用蒜爆香特別惹味， 帶子就較為細粒， 家常菜可接受。海南雞半隻$98雞肉唔算好滑， 雞皮夠爽， 切得好大件， 伴菜有好多炸花生。 海南雞個酸汁，唔係好正宗， 反而 薑蓉和黑豉油唔錯。套餐仲包括餐飲， 夠曬抵食抵飲。 凍檸茶茶味夠。 餐牌仲介紹唔少鐵板餐， 下次有機會再嚟試。