老媽拌麵 (屯門市廣場1期) (已結業)

同朋友黎左屯門行下，攰攰地去搵個地方食下野，黎左老媽拌麵，店內好濶下好坐咁樣。有兩邊坐位，兩邊都好光猛感覺衞生。餐牌係從早到晚一樣的，主打麵食，亦有少量飯食供應。入座後店員提供QR CODE落單，介面易用清晰，係方便嘅。餐廳有水供應，送上的是凍水，如想要熱水洗餐具，亦可以問店員攞。自行落完單後不久，店員便送上收據，有禮地問下有無錯誤之類。麵食加$28可以有特飲，要了老媽黑糖珍珠鮮奶茶同老媽黑糖珍珠巧克力，兩杯都有黑糖掛杯的效果幾靚喎，黑糖味很香，珍珠有咬口，而且甜度適中好好飲。自己點了地獄麻辣牛拌麵，要了粗麵同加底，賣相不錯嘛。牛肉嫩滑牛味濃，好味。滷蛋有溏心效果喎，仲幾有蛋香添。麵條有咬口，拌上麻辣汁香口惹味，個人覺得不算太辣很易入口，不錯不錯。朋友點的清燉三寶牛肉麵，一樣是揀了粗麵加底，賣相同樣靚靚。湯頭清甜好味，飲完亦無口渴。牛三寶有牛腱牛筋牛肚，三樣都炆得軟腍，牛味十足，加上菇菇蘿蔔等帶點蔬菜的清甜，碗麵感覺平衡又好味，抵讚。朋友同自己都屬大食之人，加底後份量就差不多了，而且加底不用加錢幾化算吖。