早輪又睇過好多介紹，於是夾個時間，收工就同幾個朋友一齊過黎
餐廳臨海，部分位置可以見到無敵大海景，望出去都幾靚嘅，食飯前早少少入去影下相留念都靚。比較可惜係我地收工入到去都比較夜啲，錯過左日落景色，有機會去要再入去走走，始終日日番工放工都好沉悶，假日應該搵啲地方多走，影下相。
餐廳位置闊落，近門口位置可以見到擺放魚缸同冰櫃，擺放當日新鮮運到嘅海產，菲律賓石蟹、花金鼓、池魚、日本生蠔、花竹蝦、各款貝殼類等，客人可以親自去揀選，明碼實價，食得放心。裝潢方面花過唔少心思，用上木、竹等元素，具日式風味。人多嘅可以考慮預訂房間，更近海邊，不過我地就冇問及收費。
餐牌供應沙律、前菜、時令海產、刺身、壽司、丼飯、烏冬、燒物、炸物、甜品等，定價中上。一行四人款款都試下，人均六百多。
季節刺身特上選拼盤 $888/8種
由師傅揀選當日新鮮嘅海產砌成賣相極吸引嘅刺身拼盤，有拖羅、金槍、油甘魚、海膽、帆立貝、章紅魚、金目鯛等。海膽鮮甜冇腥味，口感綿滑，夾埋脆口紫菜，連平時唔好海膽嘅我都食唔停口。帆立貝、油甘魚柔軟鮮味，基本上對呢八款刺身嘅新鮮度無需懷疑
壽司：海膽軍艦 $70/件、香蔥吞拿魚腩軍艦 $45/件、蟹籽軍艦 $35/件、黃金魷魚軍艦 $35/件
吞魚腩好滑溜，入口即溶
海膽味道濃厚；蟹籽、黃金魷魚軍艦屬正常水平，份量大方。壽司飯口感煙韌，但紫菜唔夠香脆，略腍。
1
天婦羅海老卷 $160
一共四件，壽司飯比較大件，海老爽口，加上芝麻同沙律醬，係好食，但個人認為其他食物會比較划算。
生蠔 $40/隻
日本生蠔都幾大隻，蠔身燒到脹卜卜，軟滑多汁，鐘意食蠔嘅朋友不能錯過，定價合理。
帆立貝 (浜燒) $98/隻
帆立貝好大隻，剪開燒會比較易熟啲，為免帆立貝太乾身，一邊燒一邊可以加入木魚水。
即時剪開左，每份依然係好大隻，一口放入，口感豐滿，貝身軟腍，不過就冇想像中鮮味，相對之下，生蠔更加抵食。
中蝦 (浜燒) $168/4隻
同樣地，蝦嘅size都唔細，肉質爽口，頗有水準。
馬刀貝 (浜燒) $118/4隻
唔係太大隻，肉質爽口，不過性價比唔高。
燒油甘魚骹 $120
雖然平時唔係好鐘意食魚頭、魚骹，但十分推介呢款油甘骹，簡單鹽燒已經好香，魚骹冇細骨，而且魚肉好嫩滑，魚油豐富，完全唔乾。
一行四人都好喜歡，淨係食剩啲骨。
清酒蝴蝶蚌 $188/8隻
蝴蝶蚌感覺比平時食到嘅再大隻啲，粒粒脹卜卜，肉厚多汁，乾淨冇沙，加上淡淡清酒味，更顯鮮甜。
炸白飯魚乾 $48
入口脆身，薄薄一片，又香口。
岩鹽枝豆 $45
今晚於三家村水產進餐，甚有風味，正宗嘅浜燒都係第一次食，除左刺身、海鮮新鮮不在話下，但全晚令我印象最深刻嘅卻係燒油甘魚骹，十分回味，值得試試
餐牌：
