卷王 (已結業)

去旺角少不了會去登打士街掃街，左一串右一串，呢日行到盡頭，轉入花園街，發現呢一檔賣手卷既舖頭。男朋友見到人地食緊既海膽手卷就雙眼發亮，於是就買左一個share食！ 海膽手卷 ($60)食過好多間立食手卷店，呢間海膽手卷既價錢係我食過最貴...一般都係$30~50到，呢間索價$60，係比較貴左少少。 一拎到埋手，見到金黃色既海膽鋪左係手卷面，望落都好有色澤同幾新鮮，等相機食完就忍唔住啜一啖海膽先！我自己對手卷店用既海膽，只要無苦味或奇怪味，已經心滿意足。估唔到呢間手卷店既海膽十分鮮甜又滑溜，size又唔會過份地細粒，質素唔錯！啜完海膽，咬左紫菜一啖，都幾薄同脆！好可惜，再食落去既時候，食到啲飯係暖，搞到塊紫菜沾左濕氣，最後又係比較難咬開。不過要讚既係，青瓜夠多，夾埋黏黏的壽司飯一齊食好清新！ 食到最後，感覺有少少唔過癮，因為海膽既份量比較少，如果可以鋪滿啲，$60有咁既海膽質素，都不為枉過。