路邊煱 (已結業)

而家打邊爐，就算你任飲任食，都未必可以draw到人嚟，但反而你用心推出唔同gimmick,再加埋任食，就算你開到幾山卡啦都好多人會願意入嚟等同食。呢間路邊煱都幾唔就腳，要落左巴士穿過一條小巷先去到。去到有勁多人等緊，但店員都好識做，話不如去佢地另一分店，仲話叫佢地搭的士claim番錢添！呢樣我都幾欣賞，唔係話貪你的士果幾十蚊，其實就算搭左都未必claim，但呢種服務態度真係幾好。再等我一陣就入得喇，嗌左個招牌雜錦花甲蟹煱，少少小食同火煱配料。小食推介:八味豆腐薄薄的炸粉，蓋住滑溜的豆腐，加上香料，非常惹味！終於等到個煱黎喇，一黎到勁香，一打開個蟹蓋，真係嘩左聲！因為個蟹蓋舖滿橙色既就膏!!大家極速分左啲膏，就裝左啲湯同食左啲蟹先，事關店員話而家嘅肉係啱啱好，如果唔係就會好鞋架喇。一飲個湯，真係好清甜，蟹既餘香係個口度浪下浪下，好想飲多碗，可惜已經差不多無哂湯啦。火煱配料推介以下幾款:牛頸脊每片大小一樣，灼佢10秒變色就可以食，入口即溶，牛油滿溢。推介！響鈴朋友說係即叫即整，熱辣辣，浸佢兩秒好拎上黎，腐材好薄但有勁香豆味，正！