羅麥記 (V City) (已結業)

今日放假同舊同學聚舊，去左羅麥記食下午茶，啱晒我地呢D老朋友，食野吹水之餘，加添幾份懷舊情懷，感覺幾好~ 佢地既午市套餐升級優惠平日由11點至6點，叫個粉麵加飲品都平D~於是叫左個羅麥雞脾撈丁，應該係招牌菜黎，我見都好多人食，果然幾好味，正所謂雞脾打人牙胶軟，加埋公仔麵簡直無敵，都幾惹味，加上瑞士雞翼汁甜甜地，唔肚餓都食得晒~ 不過我地兩份食~一個麵就唔夠飽，另外叫點小食啦，蜂蜜魷魚鬚就啱啱好，邊傾計邊食又方便，呢個魷魚加左蜂蜜，真係好有懷舊FEEL，少少硬少少脆，好好咬，用黎吹水一流~食完之後都未夠飽，又想坐多陣，再叫多個黑汁墨魚蘇，因為我地兩個都係魷魚怪，趁後生唔使留口，決定再戰魷魚。呢個又唔同風味，多汁濃味，魷魚又較軟身，好好味，仲以為叫多左，好快就食晒~~~我個舊同學就飲北海道牛奶咖啡，我都試左幾啖，牛奶香，咖啡味較淡但唔苦，好啱女仔飲，又可以提神，味道又不太濃~而我就叫左菠蘿粒粒冰，好似以前細個個陣，哇~ 果然味道同感覺都返晒黎，菠蘿好味，杯冰夠凍，甜得黎又唔太甜，夏天飲一流，仲好似做番細路仔個陣咁~