花宵 (已結業)

放工去間居酒屋傾下計都幾舒服，唔洗趕趕急急，今次搵到間係銅鑼灣晚居酒屋叫花宵，環境好舒服而且食物即叫即整，慢慢食，唔洗拿拿林食拿拿林走。首先叫左兩個餐前小食，鱈魚干同埋紅酒醋蕃茄。呢兩個都幾正，鱈魚干薄脆，蕃茄酸酸甜甜，兩個都好開胃。之後叫左個刺身，刺身全部都好新鮮，特別喜歡係佢個牡丹蝦同埋北海道珍寶帶子，帶子勁大粒，同埋切左薄片，好鮮甜。串燒都想試，就試左牛舌、白膳同埋焦糖燒菠蘿。牛舌勁大塊，大塊得黎係爽口，必食。白膳都好食，塊魚皮燒到脆卜卜好似薯片咁，又係正的。燒菠蘿係推介之選，加左d焦糖係面又幾特別，菠蘿係新鮮菠蘿本身都好甜，估唔到d串燒都幾高質。明太子蝦餅見到鋪哂蝦米仔係面就知比貨，咬落去都好爽好重蝦味，出色。最後個甜品都好味，中意紅豆既可以一試，綠茶味唔會話好重。居酒屋環境舒服，野食又好食，staff 都好好，會推介下有咩好食，同埋都會同你傾下計，所以放工黎relax 下都不錯。