Patisserie Mon cher (已結業)

上個週末去咗荷李活道， 蘇豪行下影相，扮下文青。 影完靚相之後就梗係去醫肚啦~路經呢間位於擺花街嘅日式餅店， 難免被花巧奪目嘅櫥窗所吸引。 呢間餅店用上咗各種花朵佈置， 少女情懷十足。 櫥窗外更放滿咗日本職人親手做嘅忌廉結婚蛋糕， 雖然係dummy蛋糕, 但可睇出那種非凡手藝，即將結婚日朋友不妨考慮一下。今次就揀咗堂島卷切餅，以及堂島千層兩款蛋糕。先講下堂島卷切餅，忌廉同蛋糕嘅比例係1比1， 千祈唔好以忌廉比例咁多食落會好滯，由於用咗北海道嘅牛奶做忌廉， cream帶有濃濃嘅奶香， 而且亦甜到亦剛剛好， 一啲都唔會覺得膩。 至於蛋糕就充滿著濃郁嘅蛋香，一切落去就知道口感非常鬆軟， 空氣感十足。 難怪堂島卷可以成為呢家日式餅店嘅招牌蛋糕啦~另外就叫咗堂島千層蛋糕， 呢個堂島千層蛋糕有成20層pancake， 每層pancake都煎到好似紙咁薄，中間塗上薄薄嘅忌廉，用叉切下亦唔會變得鬆散。 班戟口感帶點煙靭，同軟滑嘅忌廉形成強烈對比。 每一口都帶來強烈嘅滿足感。由於太好味，忍唔住都買多幾件返屋企孝敬老媽子， 屋企人都大讚非常好食呢~