辛安東元祖奶奶雞 (已結業)

朕對雞煲可為情有獨鍾，今日本來想食雞煲的，但朕既貼身隨從今日整天嚷着要食高麗食品，在朕既苦苦思索下，終於想到一個兩全其美既方法，就食高麗雞煲。呢間奶奶雞朕都唔係第一次食，佢幾間分店朕都去過，但呢間既輪候時間係最短既，一入到去梗係叫杯野飲濕濕個口先啦！Cider Rita 梨味，成枝野反轉倒插落杯，梨味汽水非常冰凍，清涼解渴。冷海哲，海哲爽口彈牙，加埋芝蔴就哂香口，仲有少少酸醋，夠哂開胃既餐前小食。魷魚泡菜，高麗泡菜辣辣地，夾埋魷魚絲，一爽一滑，有豐富既口感，佐口小食！紫菜飯卷，有青瓜，玉子，紅黃蘿蔔，蟹柳仲有火腿，紫菜夠脆口，用料充足。梨蜜雞翼，雞翼煮到香脆可口，再燴入梨子汁，酸酸辣辣，可口又開胃。牛肋骨鍋，鍋內有紅白蘿蔔，煮到非常之𣺉身，吸收哂啲牛肋骨味，而牛肋骨亦煮到香稔鬆軟，一口食落滲出濃濃既牛味！讚！！！終於到主角出場，奶奶雞全隻，朕叫左小辣，雞肉炒至嫩滑香口，另外配料亦煮至冧身，個底亦加左個薯粉底（好Q）加埋本身既汁料略帶微辣，香味濃郁，令人一試難忘。－－－－－完－－－－－