S2 鐵板燒 (已結業)

今日同太太去咗尖沙咀佐敦行街，行到廟街就上網睇吓附近有啲乜嘢好嘢食，見到依一間鐵板燒都好似幾好，就去試吓啦。其實依間鋪頭都有啲難搵，不過因為以前去過呢條街嘅酒吧飲嘢，所以就知道。鋪頭細細間，但係都唔會坐得唔舒服，杯茶有粒好似青檸，幾特別同埋好好飲。支筷子係好環保，因為淨係換咗頭食嘢嗰部份，印象已經好好因為覺得佢好有心。叫咗個海膽杯，我覺得係signature dish，好多層唔同嘅用料係一隻杯裏邊，海膽亦都有好多，好值得再返嚟食，仲叫咗個燒蠔同蟹鉗小食。蠔燒得好香，仲有啲櫻花蝦，好夾啲味。蟹鉗就食得好方便，最好攞嚟送酒。😁開始上主菜啦，個龍蝦好多芝士，真係好食，啲殼佢地處理得好好，好容易就食到啲肉，真係為我地啲懶人着想。燒鰻魚燒得好脆，啱啱好。炒飯炒得好香，仲有個錫紙燒菇，都好香。最後有一個幾特別嘅蜆湯，上枱嗰陣要剪開個袋，熱辣辣，好鮮甜。雖然冇食甜品，都係一個好滿足好開心嘅一餐晚飯。下次嚟佐敦一定再嚟。