媽咪隨意屋 (已結業)

今日係元州商場，經過媽咪隨意屋見到個店員好熱情咁介紹餐單，所以就試下啦! 🤣因為阿妹唔係好肚餓，所以我地就嗌左鮮肉船粉（牛）套餐配泰式凍奶茶、沙爹串燒雞、雞軟骨同菠蘿蝶豆花。鮮肉船粉（牛）好足料！除左有牛肉片之外，仲有好彈牙嘅肉丸同炸豬皮最正嘅就係面頭有唔少九層塔！（個人超鍾意食九層塔😍）啲粉嘅份量都唔少，唔會食幾啖就無曬粉。我亦好鍾意粉嘅質地，啱啱好，有咬口。而湯嘅味道就似越南湯河，所以鍾意食越南粉嘅一定會覺得唔錯。泰式奶茶係店員推介。一開始有啲驚會好甜，但飲落完全唔係平時泰式奶茶嗰隻死甜。好正！🤩如果想挑戰泰式奶茶，又唔鍾意飲咁甜，絕對可以一試。雞軟骨份量超多！不停食都仲有咁。炸得好脆，又唔會淨係食到層炸粉，好有咬口！大推！！！⭐️⭐️⭐️⭐️⭐️沙爹串燒雞肉製超滑！聽老闆娘介紹試下唔點汁食， 啲雞肉都好夠味。咁當然鍾意濃味啲，點汁食就仲惹味。菠蘿蝶豆花個漸層好靚，岩曬打卡。（老闆娘話絕無色素添加，所以可以放心飲）飲落好清爽，似檸檬梳打，有菠蘿粒就更添口感，夏天就最啱飲。😋仲有就係依間店嘅食物係唔落味精，所以唔會有食完好口渴嘅問題。下次再經過一定會試埋熱門嘅海南雞飯！