小曼谷泰國美食 (教育路) (已結業)

要食泰國菜，唔係只係九龍城先有，位於元朗教育路嘅「小曼谷泰國美食」，食物都非常高質，作為大西北人，一定唔會未試過嘅。是日假日，出去玩左成日，返到屋企唔想煮飯，所以順路係元朗買外賣返屋企食。泰式鮮蝦柚子沙律：食泰國菜我點都會叫一份沙律，貪佢夠清爽，平時成日叫木瓜沙律呀鳳爪沙律果d，今日突然想轉下口味試下新野，所以叫左泰式鮮蝦柚子沙律。柚子非常清新，咬落不但脆口，而且仲好juicy，配埋鮮蝦、蒜片同醬汁，食落惹味得黎仲好開胃添。泰式馬拉盞炒椰菜苗：我最喜歡就係馬拉盞炒菜，平時炒通菜就食得多，今日試下炒椰菜苗先。椰菜苗沾上馬拉盞後鹹香惹味，配埋蝦乾，口感爽脆，配埋椰菜苗，超有咬口，份量十足。鮮芒蟹肉炒飯：芒果加蟹肉炒成嘅炒飯，食落較一般嘅濕潤，有少少似菠蘿炒飯，食落唔算油膩。蟹肉同芒果份量都唔少，配料仲有青瓜、三色豆同埋蛋，配埋肉鬆一齊食，非常夾，最值得一讚嘅係芒果非常香甜，一d都唔酸，幾開胃。泰式炸魚餅：炸蝦餅同炸魚餅都係我最欣賞嘅泰式小食，呢度一份炸魚餅有5件，以＄71 呢個價錢都算超值。魚餅炸得剛剛好，外層金黃夠脆，入口爽口彈牙，口感十足，魚肉味道夠重，再配埋泰式辣醬食，真係風味十足。