花宵 (已結業)

又有朋友準備移民，揀咗呢間樓上居酒屋同佢餞行，環境比較寧靜，係傾偈嘅好地方。呢間居酒屋除咗平時食開嘅壽司刺身款式，仲有全條魚嘅刺身，選擇比較多，memu極多版。今次叫咗池魚刺身、花宵特上壽司拼盤、串燒，同埋海膽炒飯。池魚刺身呢個真心推薦👍🏻成條池魚即刻劏，個魚頭同魚骨會整成船既形狀一齊上碟。肉質緊實爽口，淡淡嘅魚鮮味，厚切再點少少醬油帶出鮮味。花宵特上壽司拼盤(6款12件）師傅會精選6款最新鮮嘅食材，每晚都唔同，嗰晚有炙燒中拖羅，超厚切嘅帶子，油金魚，深海池魚，牡丹蝦海膽，炙燒左口魚。串燒（厚切牛舌、免治雞肉、豚肉露筍）牛舌有咬勁，加埋適量牛油脂香，一直係本人最愛；免治雞肉串都係必點，嫩滑雞肉加上日本蛋黃同埋醬油而成嘅汁，好好食；豚肉露筍串，薄薄既豚肉包著露筍，露筍中和豚肉油膩度。海膽炒飯炒飯粒粒分明，炒飯面有少許海膽，配料有炒蛋碎同埋蔥花，炒得好夠鑊氣。