新竹園軒

營業中

休息中

新竹園軒係尖沙咀一間新開茶樓，之前媽媽接倒佢嘅傳單話想試下，就趁周末帶佢黎飲茶。店面同其他連鎖茶唔算大，不過坐得都鬆動唔會好迫。茶錢$15/位，花生$20/碟。鮮蝦腐皮卷($38) - 腐皮卷上枱時熱辣辣，腐皮煎到脆脆地，中間蝦肉爽口，簡單蘸喼汁食已經好食。招牌蝦餃皇($42) - 蝦餃皮唔會太厚，仲隱約見倒入面嘅餡料，蝦同豬肉比較各佔一半，肉質扎實。山竹牛肉球($34) - 牛肉球好腍好滑。南翔小籠包($38) - 小籠包包皮唔會太厚，但夾起時又唔會好易穿，入面嘅肉餡比平時食倒嘅小籠包多，不過上枱時都幾熱，最好攤一陣先食。流沙奶黃包($34) - 奶黃包好軟熟，掰開入面奶黃好流沙，奶黃味非常香濃。蠔油芥蘭($58) - 芥蘭冇苦澀味，芥蘭莖脆口唔會太老。楊枝金露($34) - 比想像中大碗，入面都好多芒果、碌柚同西米，酸甜度啱啱好。薑茶湯圓($30) - 薑茶重薑味又唔會太辣，湯圓用左寧波湯圓，雖然細粒啲，但湯丸皮好薄好湯，中間芝麻餡好流沙。總結，點心因為係即做，所以全部好夠熱，座位唔會太迫坐得舒服，招手都好容易叫倒侍應。