食之劇場餐廳 (已結業)

疫情太悶見到西貢呢間酒店有住宿優惠，上星期同小朋友去玩一日，酒店附近餐廳唔多所以lunch我地近近地去試下酒店內呢間日本餐廳。一坐低店員唔係介紹有咩食，放低枝水話枝水來自日本白神山，餐廳煮任何食物都會用佢，聽落即刻覺得⋯wooow 真係高級餐廳先做到，哈！Lunch set 有前菜、湯同甜品，沙律好新鮮，可惜小朋友對條冷縮毛巾大興趣過碟沙律，哈哈！主菜我地大人食壽司不過太餓食完都無影相，唯有影下小朋友碟雞扒定食，雞扒份量剛好，雞扒唔係全熟但日本雞先可以，入口嫩滑有雞味，點埋沙律醬更加惹味。我估唔到小朋友對配菜都咁有興趣，日本淮山好有益，食入口非常爽口，不過有少少酸酸地嘅味道，估唔到小朋友接受到仲話好好味，麵豉湯味道超級濃郁，小朋友食完飯一口氣飲晒一碗。最後梗係有小朋友最開心的甜品時間，見到佢食到津津有味，就知好味啦！疫情實在太悶，難得可以去遠d，大人小朋友都過咗一個好relex的weekend。