新麻蒲 BBQ (波斯富街) (已結業)

放工突然想食韓國燒烤但我朋友又話想食部隊鍋，諗返起之前同事講過新麻蒲有燒烤＋部隊鍋，所以決定去銅鑼灣呢間，食飽仲可以行下街。我同朋友兩個人七點多去到，好在間餐廳都幾大，仲有位唔駛點等就可以坐。我哋好餓所以馬上點餐。我哋兩個人叫咗個牛＋豬肉套餐，因為呢個套餐咩都有D，大家都開心D。個套餐其實都幾多嘢食，先黎咗D前菜、配菜、沙律、牛肉壽司同個部隊鍋。個沙律幾開胃同牛肉壽司我要咗半熟都幾好味！個部隊鍋係平時嘅細牌，但係都足料，有午餐肉、肥牛、腸仔、年糕、金菇、即食麵等等。個套餐嘅主菜真係幾正！有佢哋嘅招牌䕶心肉同牛排骨仲有好靚仔嘅霜降牛肉！😋上面仲有豬肉腸仔、好大隻嘅大蝦、年糕同磨菇！D牛排骨好有牛肉鮮味、霜降牛肉D油花好靚，燒起黎好香！我最鍾意個䕶心肉，食落好軟好滑又有鮮味，好正！隻大蝦 🦐都幾大隻又好鮮甜！我哋兩個都叫咗杯藍天檸檬汽水，個樣又靚又好飲！最後雖然好飽但係個餐有甜品，咁當然要食下啦！我哋叫咗佢哋個招牌紅豆豆粉雪花冰，個冰好綿，好多豆粉又唔會太甜，幾好味！😋