花宵 (已結業)

今日來到銅鑼灣做body check，做完餓左成朝乜都未食，老婆就建議去登龍街尋寶，收到傳單見呢間日本野好似唔錯，就即管試下。餐廳門口掛滿日式燈籠，裝潢好似日式居酒屋，有興趣嘅更可以坐吧檯，邊食邊睇住廚師製作料理。午餐有相當多選擇，每個餐都有沙律、蒸蛋及麵豉湯，我地揀咗一個自選丼及一分壽喜燒。落order後店員就送上沙律及蒸蛋，沙律係薯仔沙律，沙律菜好新鮮，配埋日式柚子汁，酸酸地相當開胃；蒸蛋有冬菇及瑤柱粒，入口好滑。自選丼 :我哋揀咗三文魚、吞拿魚及油甘魚，每樣刺身都係厚切，非常新鮮，當中吞拿魚尤其特別，經輕微醃製後，味道更為濃郁，配菜有玉子及酸蘿蔔，配埋魚生飯食一流。壽喜燒 :牛肉份量相當多，肉質嫩滑唔韌，配菜有豆腐、金菇及娃娃菜，吸收晒壽喜燒嘅甜醬油湯底，非常好味。