木槇料理 (已結業)

朋友邀請嚟呢間日本菜，一嚟到感覺好優雅，木既長走廊設計，感覺好舒服，坐位都好寬敞。叫左前菜枝豆$38，比我平時食既較soft, 而且豆味濃，絕對唔係出面冰凍硬實既貨色。另一前菜，煎餃子$48，皮薄餡juicy柔軟，煎到個底脆脆，yummy!送酒小吃，燒烏魚子$78，咸香魚子加青瓜食，第一次，但又唔錯，互相中和，唔覺得膩。主菜叫左極上壽司丼定食$398，一上碟眼前一亮，全部刺身好肥美，而且超厚切，鋪滿到見唔到飯，有我至愛既大海膽，大拖羅，中拖羅，三文魚籽；其餘的油甘魚腩，三文魚腩，帶子，牡丹蝦，鯖魚等都比平時見到既肥美好多，果然真材實料。值得一提是深海池魚，原來大條既池魚係咁鮮美多魚油。麵豉湯雖然度度都有，但呢度既有鮮味，唔係一味咸，昆布豆腐又多，平時唔多飲麵豉湯既我，今次飲晒，哈哈，呢d先係日本人至愛既麵豉湯定食中仲有豆腐同沙律，整體都好有水準，睇得出佢地對食物，從微小的都好有要求。最後叫左個熱飯作結尾，滑蛋黑豚扒飯，熱辣辣既炸豬扒，脆皮但粉唔厚，豬扒仍juicy唔乾身，配埋滑蛋汁，唔錯!店員介紹呢度雪芭係成個水果的，但今次貪心叫埋好多野，真係食唔落，下次一定要留肚試吓