五穀豐收 (已結業)

係附近買完野跟住要揾食， 老公話要食蕃茄湯底， 咁岩呢度有， 一於試下啦叫左2個餐， 呢個係蕃茄湯牛腩&泰式燒肉米線。 湯底色水好靚， 但飲落唔重蕃茄味， 應該有落茄膏， 呢度sell健康野但蕃茄湯少鮮茄味仲落埋茄膏就真係唔合格啦。 唔夠味落埋薯仔一齊煲其實已經好甜， 成本亦唔貴呀！ 餸方面味道唔錯既， 牛腩夠淋又入味， 可惜得2舊。 燒肉都係2舊， 皮已經唔脆了， 肉質好鞋好實， 但肉味幾香， 食唔到泰式既感覺， 可能泰式同港式無咩分別。五穀飯配西檸雞翼到。 賣相幾好聞落好香檸汁味， 仲配左份我唔知會有既豆腐， 第一印象相當好。食啖飯先， 有點乾硬， 我屋企食開紅米飯都唔覺有咁硬。 睇唔出有五種穀物， 不過無所謂啦， 個飯撈左檸汁好好味， 因為個檸汁做得唔錯， 但餐牌明明係寫西檸， 黎到無論片檸檬定個檸汁都令我覺得佢係普通黃檸檬。雞翼已經唔脆， 但個汁好味補救返！ 整體都唔錯。 最驚喜係個豆腐， 好滑而且豆味相當濃厚！ 勁好食！跟餐有糖水， 揀左最貴果系列， 仍然好抵！海底椰椰汁西米露， 椰汁好香， 海底椰都唔少， 正！椰汁黑糯米， 又係椰汁好香， 黑糯米煮得軟糯， 又係正！