Slim's (已結業)

歡樂時光飲完藍妹生啤，XO仔與小迷兵就分道揚鑣各有各去開餐，飯後喺條街度居然再次碰頭，二人唔洗講野，笑著口咁就行咗入去面前o既「Slim's」度實行馬拉松式吹多一輪！酒吧樓底極高，不過滿地花生殼，感覺唔係咁乾淨囉。小肥自問飲唔落咁多啤酒，最終都係選擇飲返意大利汽酒，全日都只售$38，抵呀！飲完第一杯，細佬頭頂個冷氣機開始滴水，所以就決定轉個位置坐。淨飲傷胃，結果就邊吹、邊食炸雞翼，仲飲多三個round添。Bucket of Wings（$58）：諗住炸雞翼$58唔會好多啦，一開波就每人先要咗客，點知個桶都幾大吓，齋睇份量已覺抵食！真係估唔到小小o既酒吧可以炸出如此乾巧鬆化o既雞翼，熱辣辣之餘，入口更覺皮脆肉嫩，爆！