花椒子 (已結業)

今日走咗去旺角行街睇戲，喺朗豪坊戲院睇完戲諗住搵啲嘢食下，想OpenRice望吓，原來附近有間專食麻辣嘢嘅餐廳，我同朋友都比較鍾意食辣，所以走去試吓。花椒子，餐廳裝修非常有格調感覺，主題辣到上太空，全店嘅裝修都圍繞太空人，望落去非常型格。涼拌豬耳，豬耳做到好爽口，份量亦都好多，少少微辣，食落去真係好開胃。川辣腎片，川辣味道非常香口，腎片好入味，食落去又香又辣又有口感。宮保雞丁，宮保雞丁材料非常豐富，入口鮮辣酥香，雞丁肉質非常嫩滑，鮮嫩嘅雞肉配合腰果香脆真係好有口感。味道層次真係好豐富，最初食到微辣，再嚟帶點甜，又有雞丁嘅香味，真係好好食用嚟送飯一流。酸菜魚，上枱酸菜魚賣相想到吸引，而且份量重要好多，魚肉嫩滑，鮮甜嘅魚味又帶一點微微香辣，魚肉完全吸收左酸菜嘅味道，真係好香好開胃。另外配料都好多，有鹹酸菜，萵筍，粉絲。食到停唔到口。最後整返杯自家製竹蔗茅根水，清熱消暑又可以解辣，呢個配搭真係啱啱好。