龍門冰室 (已結業)

龍門餐廳係數一數二嘅黃店。之前已經幫襯過好幾次，今次就第一次去銅鑼灣登龍街嘅分店，繼續懲罰一下。準時兩點鐘到達，已經有下午茶供應。 個人十分之推介呢個下午茶。因為下午茶餐係 A-G簡一款，之後1-9 再揀一款 (詳情可以睇返圖片上嘅餐牌)。總之任你配搭，而且價錢十分相宜 $38。我今次選擇嘅就係 E-卡邦尼意粉加 8-吉列豬扒嘅組合。卡邦尼意粉味道夠濃郁，分量剛好厚身又濃郁嘅白汁。 而且吉列豬扒有我手掌咁大塊，外脆而且仲保持到豬扒嘅肉汁。以茶餐廳級數嚟講已經十分到家。另外叫咗個茶餐， 沙嗲牛麵個沙嗲牛都做得唔錯。最好食嘅就係塊多士，同樣地可以有奶醬，奶油，奶沾等不同配搭 ，做人最緊要有得選擇係咪。蛋捲都煎得幾滑，加入沙嗲牛肉麵食yummy。除此之外我哋仲嗌咗一份蜜糖雞翼。 其實雞翼做小食真係可以話係冇得失手。今次都無失望。香香甜甜嘅蜜糖 加上熱辣辣嘅雞翼，味道相當配合。公平講一句龍門冰室未必係最好食嘅冰室，但係性價比同餐牌選擇嚟講，一定係略勝其他冰室幾籌。