Kobe Beef Meat Pie (已結業)

平時媽媽最鍾意行銅鑼灣崇光百貨，特別係地庫二樓嘅超級市場Freshmart，嗰度除咗有好多高質嘅日本食品同定期嘅主題推廣外，仲有一系列嘅專櫃美食，雪糕蛋糕飯團串燒日式燒餅麵包店咩都有，好多選擇。今次佢就買咗依個神户牛肉批俾我食～外面係好多層鬆脆嘅牛油酥皮，勁香口；裏面嘅神户牛肉餡加咗洋葱，啖啖都有好香濃嘅牛味仲有少許肉汁，如果啲餡可以多啲就好喇！即場食唔到嘅建議喺屋企焗番嚟食，熱辣辣香噴噴咁食先係最正！